როგორ მოვუაროთ მოტოციკლის აკუმულატორს?

ავტომობილის აკუმულატორი არის მისი სასიცოცხლო ნაწილი – იგი უზრუნველყოფს ძრავის სწრაფ დაქოქვას და კვებავს ყველა ელექტრონულ კომპონენტს. 

ზამთარში, დაბალი ტემპერატურის გათვალისწინებით, რაიდერები მოტოციკლს ნაკლებად მართავენ. ამიტომ აკუმულატორის მუშაობა საგრძნობლად მცირდება, სათანადო მოვლის გარეშე კი, აკუმულატორი ხშირად ნაადრევად წყვეტს მუშაობას.  

სწორედ ამიტომ, "პიტსტოპ მოტო" ამ ბლოგში გზამკვლევს გთავაზობთ იმის შესახებ, თუ როგორ უზრუნველყოთ მოტოციკლის აკუმულატორის ხანგრძლივი და ეფექტურ მუშაობა ზამთრის პერიოდში.

არასრული დამუხტვა

აკუმულატორის ერთ-ერთი ყველაზე დიდი მტერი არის მისი არასრული დამუხტვა, რაც იწვევს ქიმიურ პროცესს, რომელსაც სულფატირება ეწოდება. ეს ნიშნავს, რომ აკუმულატორის ფირფიტებზე წარმოიქმნება კრისტალური ნალექი, რომელიც ამცირებს მის სიმძლავრეს და საბოლოოდ აზიანებს მას. 

ეს პრობლემა განსაკუთრებით აქტუალურია, თუ მოტოციკლს იშვიათად ან მხოლოდ მცირე მანძილებზე იყენებთ, რადგან ასეთ მოკლე დროში მოტოციკლის გენერატორი ვერ ასწრებს დახარჯული ენერგიის სრულად აღდგენას. 

ამის თავიდან ასაცილებლად, თუ თქვენი მოტოციკლი ორი კვირის ან უფრო დიდი ხნის განმავლობაში უძრავად დგას, აუცილებელია გამოიყენოთ სპეციალური ავტომატური შემნახველი დამტენი. ეს მოწყობილობა მუდმივად აკონტროლებს აკუმულატორის მუხტს და საჭიროების შემთხვევაში ავსებს მას, რითაც ინარჩუნებს სრულ სიმძლავრეს ზედმეტი დატენვის რისკის გარეშე.

სისუფთავე და კონტაქტი

ჭუჭყი, მტვერი და, განსაკუთრებით კოროზია მნიშვნელოვნად ამცირებს აკუმულატორის ეფექტურობას და მის სიმძლავრეს, რადგან ეს პრობლემები ცუდი ელექტრო კონტაქტის მიზეზი ხდებიან. 

ამიტომ, პერიოდულად აუცილებელია აკუმულატორის პლუს და მინუს ტერმინალების შემოწმება კოროზიის ნიშნებზე, რაც ჩვეულებრივ მოთეთრო ან მომწვანო ნივთიერებას ჰგავს. თუ კოროზიას აღმოაჩენთ, უნდა გათიშოთ ტერმინალები და გაწმინდოთ ისინი ხისტი ჯაგრისით ან სოდასა და წყლის თბილი ნაზავით, ხოლო გაწმენდის შემდეგ აუცილებლად უნდა წაუსვათ ტერმინალებზე დიელექტრიკული ცხიმის ან პეტროლეუმის ჟელის (ვაზელინის) თხელი ფენა. 

ეს მომავალში კოროზიას ხელს შეუშლის და უზრუნველყოფს ძლიერ ელექტრონულ კავშირს.

ძველი ტიპის აკუმულატორების მოვლა 

თუ თქვენს მოტოციკლს აქვს ძველი ტიპის აკუმულატორი, რომელსაც თავსახურები აქვს და პერიოდულად წყლის დამატება სჭირდება, მას განსაკუთრებული მოვლა ესაჭიროება. 

რეგულარულად უნდა შემოწმდეს სითხის, ანუ ელექტროლიტის დონე თითოეულ უჯრედში, რომელიც აუცილებლად მონიშნულ ხაზებს შორის უნდა იყოს. თუ დონე დაბალია, საჭიროა მხოლოდ გამოხდილი წყლის დამატება, რადგან ონკანის წყალი ან სხვა სითხეები შეიცავს მინერალებს, რომლებიც აზიანებენ აკუმულატორს. 

აქ გასათვალისწინებელია ის, რომ თანამედროვე მოპედები დალუქული აკუმულატორებითაა წარმოდგენილი (AGM ან გელი), რომლებიც ამგვარ შემოწმებას არ საჭიროებს.

რჩევები ზამთრისათვის

ზამთარი არის პერიოდი, როდესაც აკუმულატორები ყველაზე მეტად ზიანდება, რადგან დაბალი ტემპერატურა და სრული დაცლა მათ სწრაფად აფუჭებს. ამიტომ, ზამთრის შენახვის დაწყებამდე აკუმულატორი სრულად უნდა დაიტენოს. 

თუ თქვენი ავტოფარეხი ცივია, უმჯობესია აკუმულატორი ამოიღოთ მოტოციკლიდან და შეინახოთ მშრალ, გრილ ადგილას, სადაც ტემპერატურა ნულს ქვემოთ არ დაეცემა. ყველაზე მნიშვნელოვანი კი ის არის, რომ აკუმულატორი დატოვოთ მიერთებული შემნახველ დამტენზე მთელი ზამთრის განმავლობაში. ეს მოწყობილობა მას მუდმივად სრულად დამუხტულს შეინარჩუნებს, რათა გაზაფხულზე მზად იყოს მუშაობისთვის.

ელექტრო სისტემის შემოწმება

ზოგჯერ აკუმულატორის პრობლემა შეიძლება სულაც არ იყოს თავად აკუმულატორის ბრალი, არამედ გამომდინარეობდეს მოტოციკლის დამუხტვის სისტემიდან. ამიტომ, დაქოქვის პრობლემების შემთხვევაში, უნდა შეამოწმოთ ვოლტაჟი: სრულად დატენილ მდგომარეობაში აკუმულატორმა უნდა აჩვენოს დაახლოებით 12.6-12.8 ვოლტი, ხოლო როდესაც მოტოციკლი მუშაობს, ვოლტაჟი უნდა იყოს 13.5-14.5 V-ის ფარგლებში. თუ ვოლტაჟი ამაზე დაბალია, ეს შეიძლება მიანიშნებდეს გენერატორის ან რეგულატორ-რექტიფიკატორის გაუმართაობაზე, რომელიც არ მუხტავს აკუმულატორს და საბოლოოდ მასაც აზიანებს.

საბოლოო ჯამში, მოტოციკლის აკუმულატორის მოვლა არ არის რთული პროცესი, მაგრამ მოითხოვს მინიმალურ, რეგულარულ ყურადღებას. თუ დაიცავთ ამ მარტივ რჩევებს, თქვენ თავიდან აიცილებთ მოულოდნელ შეფერხებებს გზაზე, გაზრდით აკუმულატორის მუშაობის ხანგრძლივობას და უზრუნველყოფთ იმას, რომ თქვენი მოტოციკლი ყოველთვის მზად იყოს ახალი თავგადასავლებისთვის!